حوارات رمضانية مع إعلامية
مع الاعلامية المصرية إيمان طرطور
نرحب بك معنا و نشكرك لقبول دعوتنا .. في البداية نريد منك تعرفي متابعينا عنك و تعطينا نبذة عن بداياتك في مجال الاعلام ؟
- انا ايمان طرطور عندي 22 سنه بدات في مجال الإعلام وانا عندي 18 سنه وبدات عملي كصحفيه في مجموعه مواقع محليه داخل المحافظه ثم اتجهت وانا عندي 19 سنه للقاهرة وبدات شغلي كمذيعه تقارير لمواقع صحفيه ثم مراسله صحفيه في مجموعه قنوات مع كبار الإعلامين وبعدها بدأت شغلي كمذيعه وانا عندي 20 سنه وكان اول برنامج ليه في قناه الصحه والجمال مع الاعلاميه دعاء الحلو والإعلامي احمد شبانه كان برنامج شبابي عملت فيه 2 سيزون وبعدها اتجهت لقناه المحور تاني برنامج ليه مع الإعلامي أحمد شيراز عملت برنامج اسمه علي حسب القعدة كان برنامج شبابي اجتماعي متنوع ونزل منه اول حلقه وصورنا الباقي ولظروف ما حصلت وقفناه بوضع مؤقت لحين تكملته بعد انتهاء الظروف الموجوده انشاء الله وإنشاء الله قريب هيكون فيه برنامج جديد هبدا تحضيره بعد العيد هنوه عنه واصرح بيه بعد انتهاء التفاوض مع القناه الي هيتم العرض عليها.
هل برأيك النجاح فى مجال الاعلام حاليا أصبح أصعب و ما رأيك في تزايد نسبة دخول الاعلاميين عن طريق الواسطة و ليس بالكفاءة ؟
- طبعااااا بقي صعب جدا وكل ما الوقت بيعدي الشغل في مجال الإعلام بيبقي اصعب علشان كم المذيعين الي تم دخولهم مبقاش زي زمان علي الساحه مذيعين قليليلن عددهم واسمائهم معروفه الموضوع زاد فظهور شخصيات مميزه بقي صعب لعدم وجود كفاءه لدي البعض، والله الي اقدر اقوله اني بزعل علي الاعلامين الي بيستسهلوا دخول المجال بالوسطه وليست الكفاءة علشان نزولهم بيبقي شئ اكيد ولو بيظهروا فدا وضع مؤقت الا الي طلع وطور من نفسه واجتهد.
نصيحة منك لمن يريد البدء في العمل بمجال الاعلام و خصوصا من النساء و ما الصعوبات التي قد تواجه المرأءة بالذات عند دخولها لمجال الاعلام ؟
- والله علشان اكون صريحه انا ديما لما بيجي حد يتكلم معايا في مهنه الإعلام وخصوصا البنات بقولها منصحكيش رغم انها مهنتي بس فيها صعوبات خصوصا للبنات وخصوصا مجال التليفزيون اكتر من الصحافه مش حابه اتكلم كتير اكيد فيه ناس محترمه بتتعامل بشكل لائق مع البنت في هذا المجال بس فعلا البنت الي تدخل المجال دااا لازم تكون بنت متنكره في صوره راجل جايه للشغل وبس وتفهم انها لما توصل بحاجه غير المجهود فدا زي ما ذكرت مسبقا نجاح مؤقت.
هل أنتي متزوجة ؟ و ماهى مواصفات شريك حياتك ؟
- لا، ههههه والله موضوع مواصفات شريك أحلامي اتسالت فيه عده مرات بس الي اقدر اقوله ان اهم حاجات ممكن اكون حطاها كمواصفات لشريك أحلامي هي انه يكون اول حاجه شخص محترم وبيراعي ربنا في حياته تاني حاجه ودا تاني اهم حاجه انه يكون شخص طموح جداااا لان الطموح الي عنده حلم وتطلع للافضل شخصيته هتكون زي فبالتالي ابقي ضامنه ان ولادنا يطلعوا كده ويطور مني طبعااااا ويشجعني اكمل حلمي لاني عن حلمي مش هتنازل مهما يحصل فهو يبقي جمبي ويطور مني باستمرار ويحترمني ويفهم دماغي علشان انا من الشخصيات الي صعب يتفهم دمغها بصراحه لاني بحب جدا لغه الحوار وبكره الهمجيه والزعيق بيجيب نتيجه عكسيه وبرج جوزاء ههههه فالغه الحوار الي لازم تكون موجوده عنده هتريح كتير وتبعدنا عن المشاكل.
كيف ممكن أن توازن الاعلامية بين عملها و واجبات بيتها عليها و خصوصا أن مجال الاعلام ليس بمجال سهل و قد يتطلب العمل أوقات طويلة و أحيانا من الممكن ان تكون مسائية ؟
- والله انا ديما بقول ان الي قد المهنه يدخلها لان زي ما حضرتك ذكرت ان المهنه دي ليها سياستها الخاصه ومن أصعب المهن فتنظيم الوقت شئ ضرورى جداا لاي سيده شغاله في هذا المجال لتجنب المشاكل يعني تعمل زي جدول يومي علشان مينفعش يبقي فيه قواعد علشان دي مهنه في ثواني ممكن حدث يحصل يتسبب في ان الطريقه الي همشي بيها في يومي تتغير بس بقدر الإمكان تحاول تنظم كل يوم قبلها بيوم بليل وتشوف تقدر توازن ازاي مابين الشغل اليوم بتاع بيتي انهرداااا علشان ميحصلش خلل في كلا الطرفين.
نحن الان في شهر رمضان . نريد منك تخبرينا ما هي عاداتك و استعداداتك الخاصة لاستقبال هذا الشهر ؟
- والله شهر رمضان من الشهور المميزه عندي جدا وخصوصا السنادي يعني كل سنه كان بيبقي عندي فيه شغل وامتحانات فطقوس شهر رمضان عندي كانت صعب اني احددها بحسب ظروف كل سنه لكن السنادي اختلفت علشان ظروف البلد الموجوده فاكتر الوقت في البيت فكانت الطقوس السنادي مختلفه شاركت اخواتي في تزين البيت ومشاركه في عمل الاكل وغيرها
ماهي أكلاتك المفضلة ؟ و هل بتعرفي تطبخي جيدا أم بتعتمدي علي الاكلات الجاهزة ؟
- بحب جدا الباستا بجميع أشكالها وأنواعها هههههه وايت صوص وريد صوص خصوصا بالاتشيكن و شوربه الكريمه بالاتشيكن والمشروم، اهاااا طبعااااا بحب اعمل اكل جداا وكريتڨ جداااا في الأكل وبحب اعمل أصناف جديده.
الان و في ظل أنتشار وباء فيروس كرونا . ماهي الاجراءات و الاحتياطات التي تفعليها لتجنب هذا المرض ؟
- والله انا شايفه ان النظافه العامه والخاصه والحرص مش محتاج كان يبقي فيه فيروس علشان نهتم بس هو الزياده طبعاا الخروج بالكمامه والجوانتي وتغيره بصفه مستمر طبعا
بالنهاية بنريد نشكرك علي حوارك معنا و بنريدك توجهي كلمة لموقعنا و أذا كان عندك اقتراح لنا بتريدي تشوفيه علي موقع جميلا الإعلام العربي ؟
- بشكر جداااا الموقع ومبسوطه بالحوار مع حضرتكم انتوا موقع هايل فكرته حلوه جدااا ولحد الان مفيش اي تعديلات او إضافات بصراحه بالتوفيق يااارب ومن نجاح لنجاح دائم.
_____________________
يمكنكم متابعة حسابات الاعلامية إيمان طرطور علي مواقع التواصل الاجتماعي
