الاعلاميات العربيات رمز للاصرار والمثابرة _ بقلم امال إدريس

نانسي ابراهيم

مذيعة قناة نايل سينما المصرية

للشجعان فقط

للشجعان فقط ، للى يقدر يحب نفسه الاول ويتصالح معاها عشان يقدر يهبه للآخر ، اللى مهما كانت مشاكله كتيرة وتجاربه غير مشجعة وهمومه وأحزانه محوطاه من كل جانب يقدر يلملم نفسه ويعيد ضبطها على ضبط المصنع ( Factory Reset ) ، كلنا للأسف بنتوخى الحذر ونفضل الركون الآمن عن الحركة الخطرة اللى ممكن تكون مخبية جواها سعادتنا ، بنختار ألا نختار فبتكون النتيجة عزل أنفسنا عن اللى حوالينا والأهم عزلنا عن مشاعرنا الداخلية زى الحب والألم والمخاطرة و السعادة المحتملة ، كل واحد للأسف بيؤثر إنه يدخل صدفته بمحض إرادته واللى للأسف بتضيق عليه شوية بشوية ونتعايش مع فكرة الاختناق المحتمل فى مقابل التعرض لتيار هوا نضيف محمل بالاحتمالات و بالأوكسجين خوفا من احتمالية الاصابة ببرد يقود لالتهاب رئوى مميت ، بنحبذ التعاسة المقيمة عن الفرحة الراحلة ، بنختار السكوت الحذر عن الكلام اللى ممكن يؤدى لفرح لمجرد إنه قد يُفضى لجرح ، بنخاف م التجربة ، م القرار ، م الاختيار ، م المغامرة لفقدانا الثقة ف الأخر أو ف نفسنا أو لعدم ثقتنا ف الظروف ولرهبتنا م التغيير ، بنفقل كل الابواب ونسك الشبابيك ونمنع النور يدخل لقلوبنا بحجة رغبتنا ف حمايته من جراح قد لا تندمل .

عشان كده لا تلوموا غيركم على جبنه ، تخاذله ، تراجعه ، اختفاءه لأن للاسف انتوا كمان بتعملوا كده وأكتر بس عيوننا مش بتشوف غير إخفاقات غيرنا ، ومش بترصد غير ثبات غيرنا ع الارض ، او تراجعه ، أو خطواته المتثاقلة رغم إننا كمان متمسمرين ف الارض .